Pyaar Kishton Mein ...

Aaj yun hi baithe baithe khayal aaya ki kaash koi aisa bank ho, jahan pyar udhhar pe milta to kitna acha hota.
Badle mein hame use jyada byaaj dar mein pyaar lautana padta.Kishton mein saara jeevan pyaar chukate rehte.
Saamne waala bhi khush ,hum bhi khush.Kyun sach nahi keh raha hoon ?

Phir laga kisi bank jaane ki jaroorat kyun pade,ye khajana to mere aas paas hi hai.Itne dost hain, pariwar wale hain aur kya chahiye.
Is pyaar ke loan ka chunaav ka vishaya bhi, Paise walon banks ki tarah hai, aapke paas bahut saare option honge par aap sabhi se to udhaar nahi lete na.
Zindagi mein pyar ka udhaar bhi aisa hi hai, iske kishton ki koi samay seema nahi hoti,ye to saari umra chalta hai.
Isiliye soch samjh ke lena jaroori hai ,kyunki zindagi bhar aur shayad uske baad bhi ye udhaar nahi chukta.
Chaliye is tathya pe thoda aur prakash daalein.

Agar bank ya kisi se paise udhar lete hain to wahan pe bahut guna-bhaag karke kishton ki bhasha ko kathintam(complex) tareeke se saja ke parosa jaata hai.Par pyar lautane ka tareeka kya aasan hoga ? kuch log kahenge haan , bas jindagi bhar us insaan se sath to nibhana hai.Par kya hum wakai us pyaar ko kai guna karke lauta paate hain?.
Hum log bus us udhaar ko bhadate rehna chahte hain.Samne wala bas hame pyaar deta rahe tabhi tak hum uska loan chukane ya yun kahein ki tabhi tak use pyaar denge.Kyun sahi kaha na?

Chaliye ek udahran lete hain. Log kehte hain maa- baap ka santaan ke prati jo pyaar hai uska koi tulna nahi hai.
Maa baap poora samay , bachon pe pyaar lutate rehte hain.Poori koshish karte hain ki achi siksha ,aaram daayak zindagi de sakein.Aur is koshish mein kaafi had tak apni yogyta anusaar safal bhi hote hai aur jyadatar usse kahin jyada karte hain.
Par badle mein kitne Shravan kumar se hum mile hain.Kya "mein" wo Sharava kumar hoon? kyaa "Aap" wo shravan kumar ho?
Naukri ke liye  ya kisi na kisi bahane/zaroortaon ke naam pe hum wo pyaar ka ghonsla chod dete hain.
Jab unhe vridhavyastha (old age) mein hamari sabse jyada jaroorat padti hai to bhavishya acha karne ki chah mein hum apne Vartmaan se samjhauta aur beete hue kal se aankhe moond lete hain.
Chaliye ab pati patni ka udahran lete hain.Sab kuch baant-te(share) hain. Dukh ,dard, bistar yahan tak ki vishwaas aur pyaar bhi.Kya rishton se bahar jaake hum uski maryada ko nahi toda?. Mein yahan sirf sharirik(physical) rishton ya paison se sambhandhit cheezon ki baat nahi kar raha hoon.Kahin dil ki gehrai mein kabhi humne kisi aur ke baare mein ya kisi aur tareeke se unka bura bhi socha?
Agar socha to kya ye dokha dena nahi hai us vishwaas se.Hum kahenge ye manav(human) fitrat hai aur ek tareeke se sahi bhi hai.To phir samaaj ke naam pe itna dikhava kyun?Ye kasmein(promises) kyun khana ki tan aur man se bas tumhara vichaar karunga jabki isme lesh matra (little bit) bhi sanshay(doubt) nahi ki hum doosron ke baare mein nakaratmak tareekon se kabhi na kabhi sochte hain.
Maine ek baat kahi thi ki zindagi ke baad bhi ye udhaar chalta rehta hai , iska ek udahran shayad hamare puranon mein Pitra rin (forefather's debt) ke zikr
ke taur pe milta hai.
Hum saari umra unke rini (indebted) rehte hain kyunki hamare purwajon ki wajah se hum yahan hain aur hume isiliye unka samman karne ki batein batayi gayi hain.
Ye pyaar ko samjhana ya samajhna dono hi kathin hai.Jaise ki Vishnu bhagwan ke do avataar (Krishna aur Ram) dono ne hume pyaar sikhaya hai par tareeke alag hain.Kyunki ye ek bhavna hai jo ki hriday(heart) se judi hai.Dono ke tareekon mein ek baat thi imaandaari aur nishtha.Jo ki har sache pyaar ke udharanon (examples) mein milti hai.
 To bas inhi sidhanton  ko, payar ka udhaar lete hue dhyaan rakhiyega.

Bank se jab paise udhaar lete hain to imaandaari se chukana padta hai nahi to defaulter ho sakte hain aur credit rating gir jaati ha.Par pyaar ke bank mein aap beimaani kar sakte hain ,koi kuch kahega nahi kyunki likha padhi to isme hoti nahi.
Par yahan default karte hain to aap ki ahmiyat apki nazron mein kam ho jayegi aur isi jeevan mein koi na koi apko bhi default karega , ye bhi jeevan ka ek katu satya hai.
Isiliye mere doston pyaar ka loan soch samajh ke lena aur lena to defaulter na bano ,iska khyal jaroor rakhan,na sirf kisi aur ke liye par apne liye bhi

 

Ehsaas...

 

 

 

Sham ka samay tha.Baarish ki boondein rim jhim baras ke bas band hi hui thi, poora sahar jaise badlon ki chadar odha hua, sondhi miiti ki khusbu se su -sajjit, behat manmohak sa tha, phir bhi kuch khalipan sa tha.

Socha kuch likha jaye aur almari ke kisi kone se apni kalam aur kora kagaz dhoond nikala.

Aaj kai din baad kalam uthaya to laga wo mujhse kuch roothi hui hai, samajh nahi aaya kya hua ise.Kuch bhi likhta to wo adhoora sa, murjhaya sa lagta.

Bahut der tak sochta raha , likhta raha par apni soch ko, wo sringar, wo rang, wo dhar nahi de paa raha tha jo honi chahiye thi.

Kuch samajh nahi aaya to bahar nikal gaya chai ke liye.Bazaar lagbhag khali tha,kuch bache baniyan nikkar mein toli bana ke hullad masti kar rahe the.

Jyadatar dukanein band thi.kuch college ke ladke chai ke dukaan pe dera jamaye the, hothon se ciggarete lagaye , gol challa bana uda rahe the.

Acha laga ye nahi keh sakta par thoda so vismay jaroor hua.

Phir chai peete peete dekha ki wahin sabzi wala apni dukaan ki sabziyon ko theek kar raha hai, sath mein unki dharampatni bhi khadi thi.

Uske chehre pe pareshani ki lakeeron ko saaf dekh sakta tha.

Socha ye bhi kya zindagi, kuch paison ke liye kitna mehnat aur aaj ki jarrorton ke hisaab se kya itna kaaf hai, bechara kya kamata aur khata hoga.

Tabhi dekha ki uski biwi ne chupe se uske hath pe apna hath rakh diya.Wo bhi uski taraf dekh ke muskura utha.

Pata nahi aisa laga jaise usse jyada khush aadmi maine aaj tak nahi dekha.

Kahan kuch pal pehle mein use bechara samajh raha tha aur kahan ab yahi vyakti mujhe sabse khush aadmi lag raha hai.

Usko dekh ke ke samajh aay ki hame bas ek ehsaas ki jarrorat hai, ek pal ka hi sahi. Tamam pareshaniyon mein bhi aap wo khushi dhoond sakte hain.

Chahe ho sabzi wala ho ya, baarish mein khelte wo adhe nanage bache ya kuch bhi jo apke kareeb ho.

Ehsaas maa ke pyar se khana khilane ka, pehli baar college jaane ka, pehle pyaar ke ikraar ka,pehli baar papa ke sath dost jaise baat karne ka.

Ye sabhi ehsaaas hume apni nazar mein khaas banate hain.

Hamare wajood, is duniya mein hamare aane ka sukoon bhara ehsaas de jaate hain.

Bas kuch pareshaniyon mein hum ye sab bhool ke, nakaratmak vichron ke bhanwar mein phanste jaate hain.Jaroorat hai to bas apnepan ke ehsaas ka, khud ko mehsoos karne ka, aur zindagi ke bahon ka khushi khushi aalingan karne ka.

Phir mujhe bhi ehsaas hua ki kalam nahi mujhse ruthi hui hai, bas soch ki syahi mein udaasi ghuli hai.Jo vicahron ki naveenta ko kagaz pe nahi aane de rahi hai.

Zindagi ek chai ki pyaali hai, isme aap cheeni dalenge to wo mithi ho jayegi ,agar mirch daalenge to tikhi ho jayegi aur kuch nahi karenge to wo phiki hi reh jayegi.

Ye hum par hai ki hum kaise chai peete hain ya phir peena chahte hain.

Waise chai ka meetha ehsaas mujhe kuch kuch ab hone laga hai....

kuch zindagi ka nasha lene do

neele aasman ki chaon mein, mujhe kuch likhne do
udte badlon ka aks, kagaz me ukerne do
chahat itni si khwabon mein sawari hai
ugte sooraj ko ek nazar ankhon mein bhar lene do

us dheemi aanch ki tapan ka nasha pee lene do
kuch zindagi ka nasha mujhe le lene do

aate pyar ko ikraar mein badalne do
bhadte kadmon ko, thodi door sath chalne do
mohabbat jaane kab se ankhon mein basai hai
un ankhon ko apne labzon mein badalne do

us behte pyar ke sailab ka nasha pee lene  do
kuch zindagi ka nasha mujhe le lene do

kampte kadmon ko, apne himaat ka sahara do
apne masoom sapno ko haqeeqat ka ashwashan do
khushi ke armaan jaane kab se aas lagaye hai
khwabon ke anchal se ab unhe udd lene do

us unmukt aasman ke pyale se nasha pee lene do
kuch zindagi ka nasha mujhe le lene do

Zindagi...

Kai saalon ki ye meri zindagi
jiya bas kuch hi pal kyun hai
poochta hai mera wajood mere attet se
itni udasi teri tanhai mein chipi kyun hai

Kuch bhaari is zindagi mein kuch hi halke pal kyun hai
jaane kya khalish is zindagi mein thehri si hui hai

kya hai wo dard jo dil mein chupa sa hai
jaate hue kyun ankhon mein tham sa jaata hai
beh jaane ki chahat mein kuch rootha sa hua hai
khud hi ko manane mein itni berukhi si kyun hai

Kuch bhaari is zindagi mein kuch hi halke pal kyun hai
jaane kya shool in ankhon mein phansi si hui hai

kabhi tha karwan mera bhi is zahan mein
aaj aks hi baaki hai waqt ke paydan mein
kuch namo-nishan na raha bachapan ke un bageechon ka
phir bhi sehar mein dhoomil sa nishan dhoondte kyun hai

Kuch bhaari is zindagi mein kuch hi halke pal kyun hai
jaane kya khumari us khamoshi mein chaai si hui hai

*********
Sehar:Awakening/Dawn(Dawn here)
khalish: unresting, troubling sensation
dhoomil:dull, lacking brightness
khumari:hangover

Ek choti si smriti....

Pata nahi shuruwat kahan se karoon,khud ko katghare mein rakhan hamesha mushkil hota hai, aaj wahi koshish kar raha hoon.
Bachpan ki bahut si yadein hain jisme aksar maine paya ki mein padhai ke liye daant ya mar kha raha hoon, par aaj us daant mein bhi pyar dekh sakta hoon mein.Kya kuch nahi kiya papa ne, office jana, aate hi mujhe padhane ke liye baith jana, par mein bhi thera jiddi,padhta tha to sirf maar ke dar se, phir usi dar ne paas to kara diya par ek kasak baki reh gayi zindagi mein, ki agar shayad maar ke dar ki jagah mann laga ke padhta to shayad aur acha kar sakta tha.
Par jo bhi ho kam se kam wo sanskar jaroor hain mujhme ki zindagi mein aur kuch nahi par ek acha insaan banna jaroori hai.

Baat 11 th class ki hai, mein padhne mein theek thak tha par itna kharab bhi nahi tha.10 th class mein acha tha padhne mein pata nahi kya hua baad mein shayad umra ka padav tha ya vidrohi man kuch aur karne ki lalsa mein apni manzil se bhatak gaya tha.
Khair kisi tarah 11 class ka exam diya, result dekha to supplimentary, vishwas nahi hua ki mein itna bura kar sakta hoon.Supplinmetary Spanish mein thi socha tha 40-45 number ayenge, agar aap 40-45 number soch ke aaoge to pass hona mushkil hi hota hai, yakeen nahi hua par kya kar sakta tha.
10 th mein spanish mein 88 the aur us samay is liye roya tha ki 100 kyun nahi hai , aaj apne result ke liye mein khud hi zimmedar tha.

Papa gaon gaye the, aate hue mere liye 12th class ki kitabein laye the. Pata nahi mere itne aalsipan aur zidd ke baad bhi unhe ye vishwas tha ki shayad mein acha karunga.Aate hi jab pata chala to pehle to bahut naraaz hue maine socha aaj bhi pitayi nishschint hai par thodi der baad papa ne bulaya aur pyar se kaha " jo hua acha nahi hua , par aage acha tum chaho to kar sakte ho, shayad kahin meri bhi galti hai , abhi tumhare paper ko 15 din hai,chalo ache se padhai karna , mein bhi sath mein baithunga tumhe padhane".

Shayad us pyar ka hi asar tha ki mein naye atma vishwas ke sath padhai ko jut gaya.Mere tution sir Mandal sir bhi mere sath jut gaye.Mein man laga ke padhai ki din mein shayad 14-15 ghante se kam nahi padhta tha. Logon se aankh milane mein sharam aati thi isiliye kahin nahi nikalta tha par papa ke kehne pe subah 5 baje ghoomne jata tha taki koi mil na jaye.
Apne sathiyon ko jab khidki se schol jate dekhta tha to bahut dukh hota tha , par sab meri hi karni ka nateeja hai.Kahir 15 din baad paper hua is baar kaafi acha kiya maine ,poori umeed thi ki is baar jaroor pass ho jaunga ache number se.Mere sath mere 2 aur sathi the.Manadal sir ne bhi kaha ki is baar 80 se kam nahi aa sakte,20 marks meri laparwahi aur kharab writing ko dhyan mein rakh ke kata tha.
Do din baad hi papa ki tabiyat kaharab ho gayi aur ve hospital mein admit ho gaye. Result bhi aane hi wala tha.Man pehli baar nahi ghabra tha yakeen tha ki ache number launga.
Result wale din school gaya,mein wait kar raha tha ki result lagane mein der kyun kar rahe hain sab.Tabhi dekha mummy ayi sath mein ek bhaiya bhi aye the , mujhe laga kuch gadbad hai. Dekha to thodi der mein result aa gaya tha. Sirf 1 ladka pass tha aur 2 fail.badkismati meri mera naam bhi fail list mein tha.Sab kuch shunya sa ho gaya tha.Bas itna hi nikla" mein fail nahi ho sakta" ansu kab ankhon se gal pe beh chale, pata hi nahi chala.Shayad gir raha tha par bhaiya ne sambhala. Mummy ko pehle hi principal sir ne phone karke bula liya tha. Jab unke cabin mein gaya to unhone kaha " Manas mujhe yakeen nahi ho raha tum fail ho gaye,tum to ache ladke ho , aur tumhare papa ne bataya ki is baar tumne mehnat bhi bahut ki thi. Mein dekhta hoon mein kya kar sakta hoon".Khair ghar aye, phone ki ghanti baje hi jaa rahi thi pata nahi papa ki tabiyat poochne ke liye ya mujhe santwana dene ke liye.
Maine kamre mein khud ko band kar liya tha.Bahut niraash ho chala tha man.Papa bhi agle din discharge hokar aa gaye the .Bade pyar se unhone smajhaya " Kabhi zindai mein safalta nahi milti,par tumne mehnat ki thi aur mujhe yakeen hai ki tum pass jaroor hoge, mein dekhta hoon kya kar sakta hoon tumhare liye."
Pehli baar papa ka wo roop dekha tha , bachpan se maar aur daant ki aadat thi , bhale hi meri galti ho ya na ho, aur yahan pe itni badi galti aur sirf pyar. Man mein baut chubhan si thi.Mere ek teacher ka phone aaya ahmedabad se wo mere primary school ke teacher the.Unhone papa se baat ki aur kaha ki Manas kabhi fail nahi ho sakta wo ek acha student hai.Phir unhone papa ko re evaluation ki baat baat batayi aur papa ko kaha ki principal sir se baat karein.

Isi beech ek vakya hua,Agle din mein subah utha aur laga ki ek bura sapna dekh raha tha,ghadi dekha 7: 15 ho gae the.Maine Jaldi se kapde pehne aur dining table pe baith gaya aur mummy se kaha, jaldi nashta laga dijiye school ke liye late ho raha hoon. Dekha to mummy chup chap thi aur unke anhon mein bhi ansoo the.Ehsaas hua ki ye sapna nahi sach tha.Bahut nirasha si hui dil mein, sar bhari sa ho gaya tha, kisi tarah kamre mein gaya aur takiye mein sir chupa ke chupchaap rone laga.Kab aankh lagi pata hi nahi chala.Papa ne 1 ghante baad principal sir ko phone kiya aur unse baat ki " Sir mein janta hoon ki result aa gaya hai par is baar mujhe manas pe yakeen hai ki wo fail nahi ho sakta.App ho sake to manas aur uske doosre dost ka re-evaluation ke liye process initiate kijiye.Agar wo fail hai to use fail hi rehne dijiye par agar wo pass hai to uska 1 saal bachane ki zimmedari meri aur apki dono ki hai".School ke itihaas mein pehli baar aisa ho raha tha.Hum dono ki copy 3 alag alag school mein gayi. Aur pata chala ki har school ke re-check mein pass tha mein.

Badkismati se mera dost pass nahi tha.Dukh hua par khushi bhi hui ki mera atma samman bach gaya,Papa ne mere spanish teacher ke liye itna hi kha mujhse , ki jo kiya unhone galat kiya par iska matlab ye nahi hai ki tum unki respect nahi karoge.Unhe phir bhi samman dena. "

Man nahi man raha tha par pitaji ne kahan tha isisliye mana bhi nahi kar sakta.Jo hua acha nahi hua par shayad un lamho ne mujhe bahut sikha diya aur sath hi acha insaan bane rehne ki prenna bhi di.Pariwar ka mahatwa bhi usi samay pata chala.Pata chala papa humse pyar jarror karte hai bas jatate nahi maa ki tarah.Unka tareeka kuch aur hota hai, bas hame samajh aana chahiye.
Mein apne ghar walon ko shayad usi samay sabse jyada samajh saka aur zindagi ka sabse khoobsoorast ehsaas bhi diya " Mera pariwar hamesha mere sath hai aur meri rakhsa karenge aur mujhse bahut prem karte hain"
Wahi pal tha jab se mere zindagi mein, mere pariwaar ki ehmiyat sabse jyada ho gayi aur samajh aaya ki jo log apse nafrat karte hain unhe bhi pyar se jeeta jaa sakta hai.Bas yahi nahi aaya ki ek teacher apne student se aisa kaise kar sakte hain aur agar mein teacher ya kuch bhi banunga to kabhi kisi se nafrat ya bhed bhav nahi karunga.Aaj bhi mein is baat pe kayam hoon.



Sach hai kabhi kabhi zindagi ke sabse mushkil pal apke sabse yaadgar pal ban jaate hain aur sath hi bahut kuch acha sikha jaate hain.
Love u my family n friends for ur unconditional love and suppport.Thnx for being part of my life.

Note:Its a fictional story

Ankahi daastan

Mumbai: Jab bhi jehan mein ye naam yaad aata hai to yad aati hai yahan ki Bheed....Lakhon karoron log... lagta hai raftaar ka doosra naam mumbai hai...
dil ki dhadkan se bhi tej yahan har basne wale bandon ki raftaar hai.Par in sab ke beech ek meri daastan hai jo kuch pal is bheed mein sukoon ke pal de gayi
thi....
Roj subah Andheri station, subah 8:33 ki local ,  platform no.2 se Churchgate ke liye jati hai.India mein shayad hi kahin 8:33 matlab "8:33" hota hai.Khair 1
saal se wahi Ist class ka dibba , wahi log , wahi darwaje ke paas meri jagah, shayad logon ki jagah bhi, bin bole sabko pata hai.Sabko chehre se janta hoon,
baat karne ki fursat kam hi hai par phir bhi dheere dheere ye saare log apne sa lagne lage.
Aaj late ho gaya tha, bhag ke train pakadni padegi ,tabhi bhagte bhagte ek aadmi se takra gayaa, chillate hue bola "Abe andha hai..." bolte bolte chup ho
gaya, "Maaf karna dost meri galti hai". Wo bola" Koi baat nahi , aksar hum andhon ke sath aisa ho jata hai.Ho sake to kya mujhe 3rd number platform pe chod doge beta". Socha chodo ,par andar basa insaan kahan maane wala tha.Socha aaj gayii train aur meeting.Khair unko choda aashirwad liya aur jab tak 2 no. platform pe aaya tab tak 8:33 ki local phurr  ho gayi thi. Khoob kosa kismat ko, tabhi kisi ne peeche se aawaz di
Wo:Suniye
Mein: Ji
Wo: Aaj apne jo kiya bada acha kaam kiya, to socha apko hello bol doon.
Gazab si kasish thi un ankhon mein, Aawaz bhi utni hi madhur thi.Suna tha aawaz chaashni si hoti hai, hansta tha tab, par aaj mehsoos bhi kiya.Pata nahi kyun shor mein bhi apni tej daudti dhadkan ko sun sakta tha.
Mein: Ji wo to bas aise hi.
beech main hi unhaone baat kat-te hue kahai
Wo: Ji maaf kijiye meri train aa gayi
8:36 ki local aur wo ladies dabbe ke 1st class ki taraf rawana ho gayi...Mein bhi apne dabbe ki taraf chal pada.
************************
" Na naam na pata phir bhi wo kuch apna sa lage
jaane kyun wo ajnabi mere dil ko chu se gaye"
************************
Office mein bhi kaam mein man na laaga , jane kya baat thi unme, ki bas unki soch mein dooba raha poore samay.Itni ladkiyon se mila par aisa pehle kabhi
baichaini si nahi hui.Socha chalo kismat pe chodte hain ki baat aage badhegi ki nahi.
Agli subah 8:36 ki local pakdi, bahut dhoonda par wo dikhi nahi.Achanak piche se aawaj ayi"Hi...mujhe dhoond rahe ho" , ek pal ko mein sakpaka gay.Wo hasne lagi . boli Sorry mein mazak kar rahi thi,aap to sach much dar gaye. Us sharati hansi mein mano sab kuch bhool jaun, aisi baat thi, samajh nahi paya ki kya kahoon, kya karoon. Kuch kahan unse maine, par yad nahi kya ,aisa lag raha tha mano mein shoonya mein hoon, besudh sa. Wo boli chalo train aa gayi mein chalti hoon, Bye.
Phir agle teen din tak wo nahi dikhi, socha wo ek paheli ki tarah ayi aur aise hi chali gayi.Khair lambhi saan li aur socha ye bas ek acha khwab tha jisse
jaagne ka samaya aa gaya.
Apne dabbe mein chada hi tha ki dekha meri roj ki jagah wo khadi hain,tabhi dabbe mein kisi ki ring tone baji "itni shiddat se maine tumhe paane ki koshish
ki hai ki har zarre ne mujhe tumse milane ki koshish ki hai....kehte hai agar kisi cheez ko dil se chaaho toh poori kaynath tumhein usse milane ki koshish
mein lag jaati hai", mein hansa aur socha shayad upar wale ka paigam hai mere liye.
Anayas hi mere muh se nikal gaya"Kahan thi aap teen din se".Wo ekdum se ghoorne lagi, "Mera matlab hai aap dikhi nahi isilie bas...sorry"
Wo boli " Koi baat nahi, meri bas tabiyat kharab thi. so I was on leave aur ladies dabbe mein kafi bheed thi so isme chad gayi".
By the way mera naam Manav hai , mein ABC company mein kaam karta hoon.
"Nisha , mein XYZ mein kaam karti hoon"
Mein:Are wo to meri hi building mein hai!!
Wo:Umeed karti hoon aap ache insaan hai , aur mujhe tang nahi karenge.
Itni bherukhi , itna ghamand , dimaag ghoom gaya ek dum se.phir mein poore raste chup hi raha , socha kaun baat kare itna bhav kha rahi hai.Us din kaam mein bhi man nahi laga.Wo ek ajnabi hi to hai, phir kyun uske liye itna sochu, par itna aasan bhi to nahi bhulana.
Agle din jaise hi mein dabbe mein chada , aawaz ayi " Sorry kal mera thoda mood upset tha"
Mein: Are nahi koi baat nahi , galti meri hi thii.
Ye dialouge shayad saare ladke marte hai,Ant mein galti ladke ki hi hoti hai,ye ab yakeen ho chala.
Kehta hain life mein bus, train aur ladki ke peeche kabhi nahi bhagan chahiye, bus ka to pata nahi train aur ladki ke peeche bhagne ka apna maza hai.
Bat dheere dheere baddhi, pata chal unka nam Nisha nahi Ritika hai, ye ladkiya pehle pehle  naam poochne par jhooth kyun bolti hain, pata nahi.
Ek din roj ki tarah train mein baat kar rahe the , tabhi Dadar pe bheed aa gayi,50 -60 se kam log nahi chade the, train ko "Sehar" kahun to wo ati-shayokti nahi hogi.
Unko bachane ke liye mein unko darwaje ke paas ki railing pe unko aage karke , unko cover kar liya par bheed itni thi kina chate hue bhi mein unke behad karreb tha. Ajeeb sa ehsaas tha, mein un sanson ko sun sakta tha,us khusboo ko mehsoos kar sakta tha.Jane kaise madhoshi si cha gayi thi.Un palon ki khamoshiyon ko samjhne ki kosish si kar raha tha. Jane kya asar tha.Wo bhi khamosh se ankhe band kiya hue the. Hawa ke jhonkon  jab unki zulfon se hote hue mere chehre pe pad rahi thi tab ek pal ke liye zindagi mein aisa laga mano wahi hai, bas wahi hai.....
Shayad...shayad pyar ka ehsaas tha
phir kuch din aise hi beet gaye.
4 din baad
Us samay unki anken thaki si thi, laal si thi, aisa laga maon wo rat bhar soyi nahi thi.Himmat karkr poocha kya baat hai to wo bas ro padi, poora station
dekh raha tha, laga aaaj pitayi confirm hai.Kisi tarah unhe smabhala , pani diya , phir wo shant hui.Poore raste na wo kuch boli na hum.
Churchgate pe pahunche, baat shuru karne ke liya kaha"aaj mausam acha hain".Wo bas halki si muskurai.Mein unke muskurahat mein bhi dukh saaf dekh sakta tha.
Maine kahan chalo Marine drive pe baithte hain.Wo kuch nahi boli bas sath chal dii.
Kafi der tak aise hi baithe rahe , phir maine dubara poocha kya hua.
"Kehte hai batane se man halka ho jaat hai,janta hoon hum ek doosre ho itne ache se nahi jante ki aap humse apni sari baat share kar sakein, par shayad ek
ache dosti ki shuruat to kar sakte hain."
Ritika ekdum se bifar padi " Mujhe apki koi sahanubhuti nahi chahiye"
Mein: Janta hoon aap ko share ki jaroorat nahi ,mein to bas sath dene ki baat kar raha tha.
Ritika halke se muskura uthi " Filmi dialougue maar rahe ho"
Mein:Sahi, matlab apne bhi Tum Bin dekhi hai.
Ritika: Thnx, apke sath acha laga.Par agar hum is baare mein abhi baat na karein to chalega.
Mein: Koi gal nahi kudiye.Chalo yahin paas mein Ice Cream achi milti hai, chalein ?
Chalte chalte yahi soch raha tha ki,Sach mein ladkiyon ke mood ka koi bharosa nahi.
Mahina beet gaya, socha agar Salary achi ho gai to unhe Propose karunga yahi sochke ache se Interview ki tyari ki aur finally ek MNC mein achi job mil gayi.
Sham ko offfice se nikala, unhe Marine drive pe milne ke liye kaha.
Bahut hi suhani thi wo sham, laga mano us khuda ne mere liye hi aaj aasman ko sajaya hai.Tabhi wo dikhi,aasman bhi unse nazrein chura lein ,itni khoobsoorat thi wo.
Thodi der ke liye mere muh se kuch na nikala.Dhyan se dekha unhe,kuch ajeeb sa shikan tha unke chere ,pata nahi wo khush thi ya dukhi.
Kya baat hai madam aaj to bahut sundar lag rahi hain.
Ritika-" Tum batao kyun bulaya?"
Mein: Bas ek choti si khushkhabri hai, nayi job mili hai , Manager position hai  aur salary bhi achi hai"
Ritika-"Ye to bahut achi baat hai"
Mein-"Kya hua tum kuch pareshan si ho.
Ritika: Mujhe ek baat kehni hai.
Mein: Kaho
Ritika-" yad hai us din mein ro rahi thi?"
Maine tumse ek baat chupai hai.
Meri shadi ko 3 saal ho gaye hain, shadi ke 6 mahine baad hi mer pati ek doosri aurat ke chakkar mein mujhe chod ke chale gaye, us din socha atma-hatya kar 
loon par pata chala, mein preganant hoon.Bahut koshish ki unhe rokne ki par wo na ruke. Saas sasur ache hain, bahu ki tarah nahi beti ki
tarah rakha mujhe, unke samjahane par bhi wo na ruke.Mein bas jee rahi thi to apne beti ke liye.Aaj 3 saal bad wo wapas aye, keh rahe teh ki wo ladki unhe
dhoka deke kisi aur jyada paise wale admi ke paas chali gayi.Mere paas wapas aana chate the, beti ka wasta de rahe the.
Maine kaha " Us samay kahan the jab mein apko
bache ka wasta deke rok rahi thi". Wo bahut mafi mangne lage, saas sasur bhi mujhe samjhane lage.
Maine kuch samay manga hain sabse. Sochti hoon kyun maaf karun, phir socha apni beti ko ek pita ka saaya mil jayega.
Ab tum hi batao mein kya karun?

Kuch pal to mujhe kuch samajh nahi aya, phir poocha kya tumuse maaf kar paogi, usse wahi pyar kar paogi, phir se use wo respect de paogi.
Wo kuch nahi boli.
Zindagi tumhari hai aur tumhe hi ye faisla lena hai kya sahi hai kya galat.

Maine kaha(pata nahi kaise par keh diya) " mein batein ghuma phira ke nahi keh sakta, ritika mein bhi apse pyar karta hoon, janta hoon ye sunke shayad apko acha na lage , kyunki samaj iski izazat nahi deta, maine apse pyar kiya apko ache se jaan ke , abhi bhi apke ateet ke baare mein janke mere dil mein apki izzat aur bhad gayi hai.
Mein apse shadi karna chata hoon, agar apko aitraaz na ho"
Wo ekdum se chup ho gayi,kafi der tak kuch na boli.
Maine kaha agar apko lagta hai , mere baat mein sacchai hai aur mein apke kaabil hoon, to mujhe apka kal sham ko yahin intezar karunga, aap ayegi to mujhe lagega apki haan hai, nahi to apki khushi mein hi meri khushi hai, sabse pehle aap meri achi dost hain. apke har faisle pe mujhe khushi hi hogi.
Kehke mein chala gaya. Agle din sham ko mein wahan khada raha, 3 ghante beet gaye, 7 baje wo ayi, meri khushi ka to kuch thikana na raha.Socha ant mein sache
pyar ki jeet hoti hi hai.
Maine jaise hi kuch kehna chaha, unhone rok diya
"Mein yahan isliye nahi ayi hoon taki apko kuch keh sakoon. Aap ache insaan hai, mujhe pasand bhi hain, par mere liye abhi mera pariwar, meri beti mujhse
jyada, meri zindagi mein mayne rakhte hain.Maaf karna shayad ye zindagi apke sath na bita paun."
Kehte kehte unke aankh se ansu aa gaye. Tabhi baarish chalu ho gayi, pata nahi aankh se mere ansu nikal rahe the ya wo baarish ka paani tha , jo bhi tha
shayad uparwale ne mujhe unke samne rote hue dikhne se bacha liya.
kuch nahi bola, bas ek doosre ko kuch der yun hi door se dekhte rahe, phir wo palti aur chali gayi.Mein bas unhe jate hue dekh raha tha.
Bas wahi baarish mein khada raha, sar jhukaye, phir pairon ki takat chali gayi aur wahi ghutnon pe baith ke , sar jhukaye baarish mein yun hi baitha raha.
************************
jaane kyun dard mein chupi tanhai hai
dil mein baichani aur ankon mein ansu samai hai
kuch daastan meri ankahi si hai
manzil se pehle hi raste mein thokar khai hai
***********************
Mumbai mein zindagi kabhi nahi thamti, kuch din baad nayi naukri ke liye andheri station pe pahuncha, gaadi Platform no 1 se pakadni thi, 2nd number platform
to peeche choot gaya tha.
Tabhi kisi ki ring tone baji
"kehte hai ki filmon ki tarah hamari zindagi mein bhi end tak sab theek hee ho jaata hai..happys endings...aur agar theek naa ho toh woh the end nahi,
picture abhi baaki hai mere dost..."
Mein bas halke se muskura diya.

Note:Its a fictional story,

Beautiful Night

Wish to hide myself in darkness
so that all night i can be with u
through silhouette of night I can always feel u
coz with every sun-rise i feel the pain of ur absence

Never wanna have beautiful sunrise in life
when night can be so beautiful with u

Goodness is what I feel
When im close enough to have u in my arms
through burning desire I can feel the warmth of urs
coz with consciousness I feel the numbness in me

Never wanna be in reality of life
when mirage can be so beautiful with u

Now when I realise the truth
knowing you can never be mine in dreams too
through the end of life I wanted to travel
coz with  incarnation i can hope to be with u

Never wanna wake alone in this life
when death can be only desire without u